İsveçli qəhrəman mundialı buraxa bilər

İsveç millisinin yarımmüdafiəçisi Yakob Yohansson dünya çempionatını buraxmaq təhlükəsi ilə üzləşib. Offside.com.az xəbər verir ki, buna səbəb onun İtaliya ilə DÇ-2018-in pley-off matçında zədələnməsidi.

İlk qarşılaşmada yeganə qola imza atan Yohansson dünən Milanda baş tutan cavab görüşündə cəmi 19 dəqiqə meydanda olub. Dizi burxulan 27 yaşlı oyunçu meydanı xərəkdə tərk edib. Bu gün tibbi müayinədən keçəcək AEK-in üzvünün zədəsinin ciddi olduğu proqnozlaşdırılır. Həkimlərin ilkin rəyinə görə, onun diz bağları qopub.

Belə olarsa, Yohansson ən azı 6 ay yaşıl meydanlardan kənarda qalacaq. Bu isə o deməkdi ki, müdafiəyəmeyilli oyunçu yayda Rusiyada keçiriləcək dünya çempionatını buraxa bilər.

Qeyd edək ki, İtaliya ilə səfərdə qolsuz bərabərə qalan İsveç yığması mundiala vəsiqə qazanıb.

apasport.az

43 baxış